لمحة عامة :

في العلاقات مافيش كلمة أسفة، إنت لازم تصلّح الغلط.

في الشكّ مابنسبش الطرف التاني لدماغه، إنت مُجبر تقدم إجابات.

في الغيرة مافيش إنت بتقيدني، في تصرف حازم بإني أكون أكثر إحترامًا لمشاعره.

في المشاكل مافيش هروب أو إنسحاب، في مواجهة وإلتزام.

في التصرفات مافيش أنا طبعي كدا، في ضبط ومحاولة للتغيير.

في المشاعر مافيش إعتمادية علي طرف واحد، في توازن في المسؤولية.

في المشاعر مافيش أصل أنا عملي وهو عاطفي، لازم نشبّع إحتياجات بعض.

في المسؤولية مافيش حضور لطرف عن طرف، إنتو الإتنين مُلزمين تنجحوا العلاقة.

مافيش البنت بتتاخد علي قد عقلها، إذا لم تكن علي توافق عقلي معاك ماتكملش.

مافيش أصل الولاد مابيحسوش، المشاعر مافيهاش ذكر وأنثي.

وقت الخناق مش حرب، دا أشد وقت للإحتواء.

وقت الخصام مش هجر وفُجر، دا أشد وقت للإنسانية وصدق المحبة ونوايا الخير.

الضغوطات مش مؤشر لسوء طرف أو أنتهاء العلاقة، دا تحدي لشدة تمسككم ببعض، الإنسحاب ساعتها دليل قاطع علي ضعف التمسك.

الفتور طبيعي جدًا في العلاقة، مش مؤشر علي جفا طرف.

العناد أول طريق لفشل العلاقة، الشخص العنيد بطبعه ميتعاشرش.

الفلوس بتشتري نوع واحد من الستات، واكيد إنت عارفه.

الأنوثة المصطنعة مش بتجذب غير نوع واحد من الرجالة، وأكيد إنت عارفه.

العلاقة مابتقومش علي راجل شديد الرجولة ولا أنثي متفجرة الأنوثة، العلاقة بتتبني علي أربع أركان.
إنجذاب القلب.
إنجذاب العقل.
الإنجذاب الجسدي.
الأنجذاب الروحي.
لازم يجتمعوا جميعًا في العلاقة، مابتنجحش علاقة بركن واحد أو رُكنين.

العلاقة مش راجل بيصرف ألوفات شهريًا ولا ست شايلة نضافة البيت علي كتافها.
"العلاقة تقدير وحِرص كل طرف علي إنه يقدم كامل مسؤولياته، إلتزاماته، حُبه، حُسن طباعه وقوة تحمّله للطرف الأخر"

الجواز مش يينهي الحُب، في طرف بيستني تعويض وإستحقاق زيادة عن اللزوم بعد الجواز.

الجواز مش بينهي الحُب، في طرف بيتحجج بكثرة المسؤوليات.

الجواز مش بينهي الحُب، في طرف كان واخد الحكاية نهايتها الجواز ف لما جات النهاية
إنتهت معاه الحكاية.

الجواز بيزيد معاه حُب العشرة والسكينة.

القوامة فرض يُحاسب عليه الرجل.

طاعة الأنثي لزوجها جهاد في سبيل الله.

العلاقات مافيهاش أنا كلامي يتسمع، في أسباب تُقدم ومن شروطها أنها تكون مُقنعة ويرضي عنها الطرف الأخر.

العلاقة مش راجل لازم يجبلي، علي قد الإمكانيات بنخطط بواقعية.

العصبية مش طبع، في تربية سمحت لشخص إنه يعلّي صوته وينفعل وخلاص تحت أي موقف.
فماتديش مساحة لشخص إنه يمارس عليك شيء في الأساس مُكتسب

"الجواز سكينة، والعلاقات راحة نفسية وعون"